Өнеркәсіп комитеті төрағасының орынбасары Мұхамед Андаков Орталық коммуникациялар қызметіндегі брифингте жеңіл өнеркәсіптің дамуы туралы баяндады. Бұл сала ел экономикасында маңызды рөл атқарып, жұмыс орындарын ашуға және өндірісті дамытуға ықпал етеді.

2024 жылғы деректер бойынша, Қазақстанның жеңіл өнеркәсіп нарығы 4,3 млрд АҚШ долларын құрады, оның 6%-ы отандық өндірушілерге тиесілі. Саланың ЖІӨ-дегі үлесі – 0,09%, өнеркәсіптік өндірістегі үлесі – 0,4%, өңдеу өнеркәсібіндегі үлесі – 0,9%. Бұл секторда 28 мың адам жұмыс істейді, олардың 60%-ын әйелдер құрайды.

2024 жылы өндіріс көлемі 211,6 млрд теңгеге жетті, ал нақты көлем индексі 86,8%-ды құрады. Соңғы үш жылда өнім экспорты 2,5 есе өсіп, салаға 12,4 млрд теңге инвестиция тартылды.

Жеңіл өнеркәсіп үш негізгі бағыттан тұрады:

• Тоқыма өнеркәсібі (57%)

• Киім өндірісі (34%)

• Былғары бұйымдар өндірісі (9%)

Бұл салада 1 411 кәсіпорын жұмыс істейді, оның ішінде 803-і – тігін, 481-і – тоқыма, 122-сі – былғары бұйымдарын өндіреді. Сектордың негізгі мақсаты – шикізаттық модельден ішкі өңдеуге көшу.

2024 жылы Батыс Қазақстан облысында биг-бэгтер өндірісі және Атырау облысында геотекстиль кластері құрылды. 2025 жылдың соңына дейін Ақтөбе облысында жүн өңдеу және Түркістан облысында мақта-тоқыма өнімдерін шығару бойынша 9 ірі инвестициялық жоба жүзеге асырылмақ.

Мемлекет бұл саланы жылдық мөлшерлемесі 3%-дан аспайтын жеңілдетілген несиелеу және отандық өнім өндірушілердің бәсекеге қабілеттілігін арттыруға бағытталған реттелетін сатып алу жүйесі арқылы қолдайды.