Қазақстанда әлеуметтік маңызы бар азық-түлік өнімдерінің бірқатары арзандады. 26 тамыздағы жағдай бойынша, есепті аптада пияз бағасы 4,8%, ақ қырыққабат 4,6%, картоп 2,9%, сәбіз 2,4%, алма 1,1% төмендеді.

Өңірлер арасында бағаның ең айқын төмендеуі Қонаевта тіркелді — 0,4%. Атырау, Жезқазған және Көкшетауда азық-түлік бағасы 0,2%-ға, ал Алматы, Қызылорда, Орал және Өскеменде 0,1%-ға арзандады.

Қазақстан бойынша пияздың орташа бағасы 179 теңге/кг болды. Ең төмен баға Түркістанда — 135 теңге. Қырыққабаттың орташа бағасы 176 теңгені құрап, Таразда 132 теңгеден сатылды.

Картоптың орташа бағасы 241 теңге/кг деңгейінде қалыптасты. Ең арзан картоп Павлодарда — 177 теңге, Қостанайда — 194 теңге болды.

Қызанақтың орташа бағасы 546 теңге/кг болса, ең төмен баға Таразда тіркелді — 315 теңге.

Әлеуметтік маңызы бар азық-түлік бағаларының индексі апта сайын есептеледі. Баға мониторингі облыс орталықтары, республикалық маңызы бар қалалар мен Астанада жүргізіледі.