Қазақстанда тамыз айының қорытындысы бойынша іскерлік белсенділік жақсарды. Ұлттық банктің дерегіне сәйкес, Іскерлік белсенділік индексі (ІБИ) 50,6 деңгейіне жетіп, шілдедегі 49,8 көрсеткішінен жоғарылады.

50 пункттен жоғары мән экономикалық белсенділіктің өсу аймағын білдіреді. Индекс Ұлттық банктің кәсіпорындар арасында жүргізетін ай сайынғы сауалнамасы негізінде қалыптастырылады. Зерттеу нақты экономикалық көрсеткіштердің өзгерісі мен кәсіпорындардың алдағы кезеңге қатысты күтулерін қамтиды.

Белсенділіктің ең жоғары көрсеткіші құрылыс саласында тіркелді – 54,8. Өңдеу өнеркәсібіндегі индекс 52,1, ал қызмет көрсету секторында 50,9 болды. Осы үш салада көрсеткіштер өсім аймағында қалды.

Сауда мен тау-кен өнеркәсібінде де жағдай жақсарған. Алайда бұл салалардағы индекстер әлі де бейтарап 50 пункттік деңгейден төмен. Саудадағы көрсеткіш 48,8, тау-кен өнеркәсібінде 48,6 болды.

Шілде айында бұл көрсеткіштер сәйкесінше 46,8 және 47,1 деңгейінде болған.

Осылайша, тамыздағы деректер Қазақстанның нақты секторындағы іскерлік белсенділіктің біртіндеп қалпына келе бастағанын көрсетеді.